Toyota-ն մշակում է էլեկտրական մեքենա՝ մեխանիկական փոխանցման տուփով։

Այն նաև ընդօրինակում է ներքին այրման շարժիչի ձայնը:

Նրանց համար, ովքեր էլեկտրական մեքենաները մի փոքր ձանձրալի են համարում, Toyota-ի ինժեներներն աշխատում են կեղծ մեխանիկական փոխանցման տուփի վրա՝ որպես հնարավոր գործառույթ:

Իրականում, էլեկտրական մեքենայում մեխանիկական փոխանցման տուփը լիովին անօգուտ է:
Սա պարզապես զվարճանքի համար կլինի, հավելում այն մարդկանց համար, ովքեր սիրում են իրենց բենզինով աշխատող մեքենաներում արագությունը փոխել:

Toyota-ն, որը երկար ժամանակ թերահավատորեն էր վերաբերվում էլեկտրական մեքենաներին, հիմա ծրագրում է ավելի ագրեսիվ շարժվել ոլորտում և ուղիներ գտնել բոլոր տեսակի սպառողներին գրավելու համար:

Նման առանձնահատկությունը կարող է օգնել գայթակղել նրանց, ում չի գրավում էլեկտրական մեքենայի սովորական սահունությունն ու պարզությունը:

Եթե վարորդը սխալ փոխանցում է ընտրում, մեքենան կցնցվի և «կլռվի», ինչպես բենզինով աշխատող մեխանիկական փոխանցման տուփով մեքենան:
Մեքենայի համակարգիչը սահմանափակում է ցնցումների քանակը՝ մարտկոցը չծանրաբեռնելու համար:

Եթե վարորդները չեն ցանկանում օգտագործել կեղծ մեխանիկական փոխանցման տուփը, կարող են անջատել այն։

Մեքենան կունենա վարման երկու ռեժիմ՝ նորմալ էլեկտրական մեքենայի ռեժիմ և արհեստական մեխանիկական ռեժիմ։

Նշվում է, որ կլինեն նաև շարժիչի կեղծ ձայներ, երբ փոխում են արագությունը։

Toyota-ի նախագահ Ակիո Տոյոդան հաստատել է, որ Toyota-ի Gazoo Racing ստորաբաժանումն արդեն մշակել է Toyota GR էլեկտրական մեքենա՝ հագեցած այս տեխնոլոգիայով, և որ ինքն անձամբ է վարել նախատիպը:

«Մեր կողմից մշակվող մյուս էլեկտրագնացներից ամենամեծ տարբերությունն այն է, որ իրականում կարող եք լսել շարժիչի աղմուկը, նույնիսկ եթե բենզինի հոտ չզգաք»,- նշել է Toyota-ի նախագահը:

Ավտոարտադրողը նախատեսում է օգտագործել տեխնոլոգիան հիբրիդներում, ինչպես նաև ամբողջությամբ էլեկտրական մեքենաներում: